+48 792 883 913
BY
Праграма “Дзеці для дзяцей” – сучасны погляд на беларускую гісторыю

“Дзеці для дзяцей” — гэта унікальны культурна-асветніцкі праект, які аб’ядноўвае дзяцей Беларусі і беларускай дыяспары. Мэта праграмы — расказаць пра герояў і гістарычныя падзеі Беларусі праз анімацыйныя фільмы, створаныя па дзіцячых малюнках, што былі зробленыя падчас семінараў па нейраілюстрацыі. Гэтыя заняткі прайшлі ў сямі польскіх гарадах, дзе дзеці ад 6 да 16 гадоў працавалі над малюнкамі вядомых гістарычных асоб: Францыска Скарыны, Анастасіі Слуцкай, Усяслава Чарадзея, Вінцэнта Дуніна-Марцінкевіча і Ігната Дамейкі.
Асаблівасць праекта ў тым, што дзеці актыўна ўдзельнічалі не толькі ў стварэнні малюнкаў, але і ў распрацоўцы сцэнарыяў для фільмаў. Напрыклад, анімацыя пра Францыска Скарыну пабудавана ў стылі коміксаў, дзе першадрукар прадстаўлены як “супергерой эпохі Адраджэння”. Гэтая ідэя ўзнікла дзякуючы дзіцячаму выбару: юныя мастакі самі абіралі стыль, форму і важныя падзеі з жыцця Скарыны, падкрэсліваючы, што веды — гэта не проста сіла, а “суперсіла”.
Праект быў рэалізаваны пры падтрымцы праграмы “Васьміног: адукацыя для беларускіх дзяцей сёння і заўтра” і фонда “Цэнтр грамадскага дыялогу”. Прэм’ера анімацыйных фільмаў прайшла ў розных гарадах, дзе дзеці і іх бацькі мелі магчымасць пабачыць плён сваёй працы. Мультфільмы ўжо заваявалі папулярнасць і набралі больш за 7 тысяч праглядаў у першыя тры тыдні пасля выхаду на YouTube-канале “Дзеці для дзяцей”.
Арганізаваныя майстар-класы і семінары па нейраілюстрацыі — гэта не толькі магчымасць пазнаёміць дзяцей з новымі тэхналогіямі, але і спосаб стварыць анімацыю, якая дапамагае захаваць беларускую гісторыю і культуру для наступных пакаленняў. Дзякуючы такім ініцыятывам дзеці вывучаюць гісторыю сваёй краіны праз мастацтва, умацоўваюць сувязь з беларускай культурай і пашыраюць свае творчыя навыкі.